देशाचा राजा कायम राहील; पण ताण वाढेल आणि महामारी अन् आर्थिक संकट येणार !

खामगाव – देशासह राज्यातील पाऊस, शेती आणि देशातील विविध विषयांवर अंदाज वर्तवणार्‍या येथील भेंडवळची भविष्यवाणी १५ मे या दिवशी पुन्हा घोषित झाली आहे. अक्षय्य तृतीयेच्या मुहूर्तावर प्रतिवर्षी जिल्ह्यातील भेंडवळ येथे पीक-पाणी, पाऊसमान यांविषयीचा अंदाज वर्तवला जातो. यंदा दळणवळण बंदीमुळे मोजक्याच सदस्यांच्या उपस्थितीत घटमांडणी करून त्यातून झालेल्या हालचालींवरून भविष्यवाणी वर्तवण्यात आली. त्यानुसार ‘यावर्षी देशात पाऊस आणि पीक परिस्थिती साधारण असेल. देशाचा राजा कायम राहील; पण ताण वाढणार असून देशावर महामारी आणि आर्थिक संकट येणार आहे’, अशी भविष्यवाणी वर्तवण्यात आली.

गेल्या ३५० वर्षांपासून भेंडवळ येथे भविष्यवाणी वर्तवण्यात येते. यंदा दळणवळण बंदीमुळे ही परंपरा खंडित होऊ नये, यासाठी केवळ चंद्रभान महाराज यांचे वंशज शिवाजी पुंजाजी महाराज वाघ आणि सारंगधर महाराज वाघ यांसह ५ लोकांनी अक्षय्य तृतीयेला सायंकाळी भेंडवळ येथे घट मांडणी केली. सूर्योदयापूर्वी घट मांडणीचे निरीक्षण करत त्यानुसार या वर्षीचे भाकीत वर्तवले.

संदर्भ : दैनिक सनातन प्रभात