पिंप्री येथे सनातन संस्थेचे युवा शौर्य जागरण शिबिर

पिंप्री (जळगाव) येथे हिंदु जनजागृती समितीच्या वतीने ‘युवा शौर्यजागरण शिबिरा’चे आयोजन करण्यात आले होते. चांदसणी-कमळगाव येथील स्वरक्षण प्रशिक्षणवर्गातील युवकांनी या उपक्रमाचे नियोजन केले होते. विठ्ठल-रखुमाई मंदिराच्या सभामंडपात प्रार्थना करून शिबिराला आरंभ झाला.

प्रारंभी समितीचे श्री. श्रेयस पिसोळकर यांनी परात्पर गुरु डॉ. जयंत बाळाजी आठवले यांचा परिचय आणि कार्य यांची ओळख करून दिली. त्यानंतर ‘स्वरक्षण प्रशिक्षण घेण्याची आवश्यकता आणि शौर्यजागरण’ या विषयावर मार्गदर्शन केले. ते म्हणाले की, आज राष्ट्र आणि धर्म यांवर होणारे आघात वाढत चालले आहेत. देशावरील बाह्य संकटे आणि देशांतर्गत वाढणार्‍या दंगली ही परिस्थिती पहाता आज प्रत्येकाने स्वरक्षण प्रशिक्षण घेणे आवश्यक आहे. हिंदूंचा इतिहास हा पराक्रमाचा आहे. हिंदु धर्मरक्षणासाठी पुरुषांसह स्त्रियांनीही पराक्रम गाजवला आहे. आज पुन्हा एकदा शौर्यजागरणाची वेळ आली आहे; म्हणून या उपक्रमाच्या माध्यमातून आपण युवकांमध्ये शौर्यजागरण करण्याचा प्रयत्न करत आहोत.’’

या वेळी चांदसणी-कमळगाव येथील श्री. कल्पेश धनगर आणि श्री. अमोल धनगर यांनी स्वरक्षणाची प्रात्यक्षिके सादर केली. या उपक्रमाला गावातील २६ युवक उपस्थित होते. शेवटी नियोजनाच्या चर्चेत पिंप्री येथील युवकांनी प्रशिक्षणवर्गाची मागणी केली आणि नियमित व्यायाम करण्याचा निश्‍चय केला.

संदर्भ : दैनिक सनातन प्रभात