ಸತ್ಸಂಗ 6 : ಪ್ರಾರ್ಥನೆ

ನಾವು ಅನೇಕ ಬಾರಿ ದೇವರಿಗೆ ಪ್ರಾರ್ಥನೆಯನ್ನು ಸಲ್ಲಿಸುತ್ತೇವೆ. ಬೆಳಗ್ಗೆ ಎದ್ದ ನಂತರ, ದೇವರ ಪೂಜೆಯನ್ನು ಮಾಡುವಾಗ, ಮನೆಯಿಂದ ಹೊರಗೆ ಬೀಳುವಾಗ, ಕೆಲವೊಮ್ಮೆ ದೇವಸ್ಥಾನಕ್ಕೆ ದೇವರದರ್ಶನಕ್ಕೆ ಹೋದಾಗ ಅಥವಾ ಕಠಿಣ ಪ್ರಸಂಗವನ್ನು ಎದುರಿಸುವ ಸಮಯ ಬಂದರೆ, ದೇವರಿಗೆ ಮನಸ್ಸಿನಲ್ಲಿಯೇ ಆರ್ತತೆಯಿಂದ ಪ್ರಾರ್ಥನೆಯನ್ನು ಮಾಡುತ್ತೇವೆ. ಹಾಗಾದರೆ ಇಂದು ನಾವು ಪ್ರಾರ್ಥನೆ ಎಂದರೆ ಏನು, ನಾವು ಪ್ರಾರ್ಥನೆಯನ್ನು ಏಕೆ ಮಾಡುತ್ತೇವೆ, ಅದರಿಂದ ನಮಗೇನು ಲಾಭವಾಗುತ್ತದೆ, ಎಂದು ತಿಳಿದುಕೊಳ್ಳೋಣ. ಪ್ರಾರ್ಥನೆಯ ಮಾಧ್ಯಮದಿಂದ ದೇವರ ಬಳಿ ಏನು ಬೇಡಬೇಕು, ವ್ಯಾವಹಾರಿಕ ವಿಷಯಗಳ ಬಗ್ಗೆ ಬೇಡಿಕೆಯಿಟ್ಟರೆ ಅದು ಯೋಗ್ಯವೇ, ಇಂತಹ ಕೆಲವು ವಿಷಯಗಳನ್ನು ನಾವು ನೋಡೋಣ.

ದೇವರಿಗೆ ಪ್ರಾರ್ಥನೆ ಸಲ್ಲಿಸುವ ಮುಖ್ಯ ಲಾಭವೇನು? ಪ್ರಾರ್ಥನೆಯಿಂದ ಮನಸ್ಸಿಗೆ ಶಾಂತಿ ಸಿಗುತ್ತದೆ. ದಿನದಲ್ಲಿ ನಾವು ಯಾರ ಮೇಲೆಯಾದರೂ ಸಿಡಿಮಿಡಿಗೊಳ್ಳುತ್ತೇವೆ, ನಮ್ಮ ಮನಸ್ಸಿನಂತೆ ಏನು ನಡೆಯುವುದಿಲ್ಲ, ಕೆಲಸಗಳು ನಿಲ್ಲತ್ತವೆ, ತಡವಾಗುತ್ತದೆ, ಓಡಾಟವಾಗುತ್ತದೆ, ಈ ತರಹದ ಅನುಭವಗಳನ್ನು ಬಹಳ ಜನರು ಪಡೆದಿರಬಹುದು. ಈ ಎಲ್ಲವುಗಳಿಂದಾಗಿ ದೈನಂದಿನ ಧಾವಂತದ ಜೀವನದಲ್ಲಿ ನಮ್ಮ ಮನಃಶಾಂತಿಯನ್ನು ಕಳೆದುಕೊಳ್ಳುತ್ತೇವೆ. ಆ ಮನಃಶಾಂತಿ ಪ್ರಾರ್ಥನೆಯಿಂದ ಸಿಗುತ್ತದೆ. ಪ್ರಾರ್ಥನೆಯಿಂದ ಸಕಾರಾತ್ಮಕತೆ ಮೂಡುತ್ತದೆ. ಅಸಾಧ್ಯವಾದ ವಿಷಯಗಳು ಸಾಧ್ಯವೆನಿಸುತ್ತವೆ; ಏಕೆಂದರೆ ಪ್ರಾರ್ಥನೆಯಿಂದ ಈಶ್ವರನ ಆಶೀರ್ವಾದ ಲಭಿಸುತ್ತದೆ. ಪ್ರಾರ್ಥನೆಯ ಮಹತ್ವ ಕೇವಲ ಅಧ್ಯಾತ್ಮದಲ್ಲಿ ತಿಳಿಸಲಾಗಿದೆ ಎಂದೇನಲ್ಲ, ವಿಜ್ಞಾನಿಗಳೂ ಅದನ್ನು ಒಪ್ಪಿಕೊಂಡಿದ್ದಾರೆ.

ತಮ್ಮ ಪೈಕಿ ಯಾರಾದರೂ ಪ್ರತಿದಿನ ಪ್ರಾರ್ಥನೆಯನ್ನು ಮಾಡುತ್ತಿದ್ದೀರಾ? ಅಥವಾ ದೇವಸ್ಥಾನಕ್ಕೆ ಹೋದ ನಂತರ ನಾವು ದೇವರಿಗೆ ಯಾವ ರೀತಿ ಪ್ರಾರ್ಥನೆ ಮಾಡುತ್ತೇವೆ?

ಪ್ರಾರ್ಥನೆ ಎಂದರೇನು

ಪ್ರಾರ್ಥನೆ ಅಂದರೆ ಯಾವುದಾದರೊಂದು ವಿಷಯವನ್ನು ತಳಮಳದಿಂದ ಬೇಡುವುದು!

ಪ್ರಾರ್ಥನೆ ಎಂದರೆ ಬೇಡುವುದು! ದೇವರ ಮುಂದೆ ನಮ್ರವಾಗಿ ಇಚ್ಛಿತ ವಿಷಯವನ್ನು ತಳಮಳದಿಂದ ಅಂದರೆ ಆರ್ತತೆಯಿಂದ ಬೇಡುವುದಕ್ಕೆ ‘ಪ್ರಾರ್ಥನೆ’ ಎಂದು ಕರೆಯುತ್ತಾರೆ. ಪ್ರಾರ್ಥನೆಯಲ್ಲಿ ಆದರ, ಪ್ರೇಮ, ವಿನಂತಿ, ಶ್ರದ್ಧೆ ಮತ್ತು ಭಕ್ತಿಭಾವ ಈ ವಿಷಯಗಳು ಒಳಗೊಂಡಿರುತ್ತವೆ. ನಾವು ಯಾವುದೇ ಕಾರ್ಯವನ್ನು ದೇವರಲ್ಲಿ ಪ್ರಾರ್ಥಿಸಿ ಮಾಡಿದರೆ ಆ ಕಾರ್ಯಕ್ಕೆ ದೇವತೆಯ ಆಶೀರ್ವಾದ ಸಿಗುತ್ತದೆ, ಹಾಗೆಯೇ ಪ್ರಾರ್ಥನೆಯಿಂದ ಆತ್ಮಶಕ್ತಿ ಮತ್ತು ಆತ್ಮವಿಶ್ವಾಸ ಹೆಚ್ಚಾಗುತ್ತದೆ. ಅದರಿಂದ ಕಾರ್ಯವು ಸುಗಮವಾಗಿ ಮತ್ತು ಯಶಸ್ವಿಯಾಗುತ್ತದೆ.

ಪ್ರಾರ್ಥನೆಯ ವೈಶಿಷ್ಟ್ಯ

ಸ್ಥೂಲದಿಂದ ಸೂಕ್ಷ್ಮದ ಕಡೆಗೆ

ಹೆಚ್ಚಿನ ಜನರು ಜೀವನದಾದ್ಯಂತ ಪೂಜೆ ಅರ್ಚನೆ, ಧಾರ್ಮಿಕ ವಿಧಿ ಇತ್ಯಾದಿ ಕರ್ಮಕಾಂಡಕ್ಕನುಸಾರ ಉಪಾಸನೆಯನ್ನು ಮಾಡುತ್ತಿರುತ್ತಾರೆ. ಕರ್ಮಕಾಂಡಕ್ಕನುಸಾರ ಉಪಾಸನೆಯು ಸ್ಥೂಲದ ಉಪಾಸನೆಯಾಗಿದೆ. ಈಶ್ವರನ ಸ್ವರೂಪವು ಸೂಕ್ಷ್ಮವಾಗಿದೆ. ಈಶ್ವರ ಪ್ರಾಪ್ತಿಯಾಗಲು ಉಪಾಸನೆಯೂ ‘ಸ್ಥೂಲದಿಂದ ಸೂಕ್ಷ್ಮದೆಡೆಗೆ’ ಕೊಂಡೊಯ್ಯುವಂತಾಗಿರಬೇಕು. ನಾವು ಈ ಹಿಂದಿನ ಸತ್ಸಂಗಗಳಲ್ಲಿ ‘ಸ್ಥೂಲಕ್ಕಿಂತ ಸೂಕ್ಷ್ಮ ಶ್ರೇಷ್ಠ’ ಎಂಬ ಆಧ್ಯಾತ್ಮಿಕ ಸಿದ್ಧಾಂತವನ್ನು ನೋಡಿದ್ದೇವೆ. ಪ್ರಾರ್ಥನೆಯನ್ನು ದೇವರಿಗೆ ಮನಸ್ಸಿನ ಸ್ತರದಲ್ಲಿ ಮಾಡುತ್ತೇವೆ; ಆದುದರಿಂದ ಅದು ‘ಸ್ಥೂಲದಿಂದ ಸೂಕ್ಷ್ಮದೆಡೆಗೆ’ ಕೊಂಡೊಯ್ಯುವ ಒಂದು ಸುಲಭ ಉಪಾಸನಾ ಪದ್ಧತಿಯಾಗಿದೆ. ಸಾಧನೆಯನ್ನು ಮಾಡುವಾಗ ಈಶ್ವರನ ಅನುಸಂಧಾನದಲ್ಲಿರುವುದು ಮಹತ್ವದ್ದಾಗಿರುತ್ತದೆ. ಸ್ವಲ್ಪ ಕಾಲಾವಧಿಯ ನಂತರ ಪ್ರಾರ್ಥನೆ ಮಾಡುವುದರಿಂದ ಈಶ್ವರನೊಂದಿಗೆ ಅನುಸಂಧಾನ ಸಾಧಿಸುವುದು ಸುಲಭವಾಗುತ್ತದೆ.

ಪ್ರಾರ್ಥನೆಯ ಪರಿಣಾಮ

ನಾವು ಆರ್ತಭಾವದಿಂದ, ಶರಣಾಗತಿಯಿಂದ ದೇವರಿಗೆ ಪ್ರಾರ್ಥನೆ ಮಾಡುತ್ತೇವೆ. ಆಗ ನಮ್ಮ ಕಾಳಜಿ ಅಥವಾ ಚಿಂತೆ ಕಡಿಮೆಯಾಗುತ್ತದೆ. ಪ್ರಾರ್ಥನೆಯಿಂದ ಚಿಂತೆಯು ಕಡಿಮೆಯಾಗಿ ಚಿಂತನ ಹೆಚ್ಚಾಗುತ್ತದೆ. ಮನಸ್ಸು ಕಾರ್ಯನಿರತವಾಗುತ್ತದೆ, ಅಲ್ಲಿಯವರೆಗೆ ಮನಸ್ಸಿನಲ್ಲಿ ವಿಚಾರಗಳು ಬರುತ್ತಲೇ ಇರುತ್ತವೆ. ನಾವು ಶರೀರದಿಂದ ಆರೋಗ್ಯವಂತರಾಗಿದ್ದರೂ, ಮನಸ್ಸಿನಲ್ಲಿ ವಿಚಾರಗಳ ಸರಪಳಿ ಇರುತ್ತದೆ. ಈ ವಿಚಾರಗಳಲ್ಲಿ ನಮ್ಮ ಬಹಳಷ್ಟು ಶಕ್ತಿ ಖರ್ಚಾಗುತ್ತದೆ. ಈ ರೀತಿ ಮನಸ್ಸಿನ ಶಕ್ತಿ ಖರ್ಚಾಗುವುದನ್ನು ತಪ್ಪಿಸಲು ಪ್ರಾರ್ಥನೆಯು ಉಪಯುಕ್ತವಾಗಿದೆ. ಪ್ರಾರ್ಥನೆಯಿಂದ ಅಸಾಧ್ಯವಾದ ವಿಷಯವೂ ಸಾಧ್ಯವಾಗುತ್ತದೆ. ದ್ರೌಪದಿಯ ವಸ್ತ್ರಹರಣದ ಪ್ರಸಂಗ ನಮಗೆಲ್ಲರಿಗೂ ಗೊತ್ತಿದೆ. ಎಲ್ಲಿಯವರೆಗೆ ದ್ರೌಪದಿಗೆ ತಾನು ಸ್ವತಃ ಅಥವಾ ಪಾಂಡವರು ಅವಳ ಶೀಲ ರಕ್ಷಿಸುವರು ಎಂದು ಅನಿಸುತ್ತಿತ್ತೋ, ಅಲ್ಲಿಯವರೆಗೆ ಶ್ರೀಕೃಷ್ಣನು ಸಹಾಯಕ್ಕೆ ಬರಲಿಲ್ಲ. ಆದರೆ ಯಾವಾಗ ದ್ರೌಪದಿಯು ಭಗವಾನ ಶ್ರೀಕೃಷ್ಣನಿಗೆ ಆರ್ತತೆಯಿಂದ ಮೊರೆಯಿಟ್ಟಳೋ, ಆಗ ಶ್ರೀಕೃಷ್ಣನು ಅವಳ ಸಹಾಯಕ್ಕೆ ಧಾವಿಸಿ ಬಂದನು. ಇದು ಪ್ರಾರ್ಥನೆಯ ಮಹತ್ವ!

ಪ್ರಾರ್ಥನೆಯಿಂದಾಗುವ ಲಾಭ

ಪ್ರಾರ್ಥನೆಯಿಂದ ನಮ್ಮ ಅಹಂಕಾರ ಬೇಗನೆ ಕಡಿಮೆಯಾಗಲು ಸಹಾಯವಾಗುತ್ತದೆ. ಅಹಂನಿಂದ ಮನುಷ್ಯನ ಜೀವನದಲ್ಲಿ ದುಃಖ ಉತ್ಪನ್ನವಾಗುತ್ತಲೇ ಇರುತ್ತದೆ. ದೇವರು ಸರ್ವಶಕ್ತಿಶಾಲಿ, ಸರ್ವಜ್ಞ, ಸರ್ವವ್ಯಾಪಿಯಾಗಿದ್ದಾನೆ. ದೇವರಿಗೆ ಅಸಾಧ್ಯವಾದದ್ದು ಯಾವುದೂ ಇಲ್ಲ. ಮನುಷ್ಯನು ಪ್ರಾರ್ಥನೆಯ ಮಾಧ್ಯಮದಿಂದ ಸರ್ವಶಕ್ತಿಶಾಲಿ ಈಶ್ವರನಿಗೆ ಶರಣು ಹೋಗುತ್ತಾನೆ. ಪ್ರಾರ್ಥನೆಯ ಮೂಲಕ ಅವನು ದೇವರ ಬಳಿ ಬೇಡುತ್ತಿರುತ್ತಾನೆ. ಇದರಿಂದ ಅವನ ಕರ್ತೃತ್ವವು ಕಳೆದುಹೋಗಲು ಸಹಾಯವಾಗುತ್ತದೆ.

ದೇವರ ಬಳಿ ಅಶಾಶ್ವತವಾದ ವಿಷಯಗಳನ್ನು ಏಕೆ ಬೇಡಬಾರದು?

ವ್ಯಾವಹಾರಿಕ ಆಸೆ ಅಪೇಕ್ಷೆಗಳ ಪೂರ್ತಿಗಾಗಿ ಮಾಡಿದ ಪ್ರಾರ್ಥನೆ ಎಂದರೆ ಸಕಾಮ ಸಾಧನೆ! ಸಕಾಮ ಸಾಧನೆಯಿಂದ ನಿಜವಾದ ಅರ್ಥದಲ್ಲಿ ಆಧ್ಯಾತ್ಮಿಕ ಉನ್ನತಿಯ ದೃಷ್ಟಿಯಿಂದ ಲಾಭವಾಗುವುದಿಲ್ಲ. ವ್ಯಾವಹಾರಿಕ ಘಟನೆಗಳು ಬಹುತೇಕ ಬಾರಿ ಪ್ರಾರಬ್ಧಕ್ಕನುಸಾರ ಘಟಿಸುತ್ತವೆ. ಗುರು ಅಥವಾ ದೇವರು ಸಾಮಾನ್ಯವಾಗಿ ಪ್ರಾರಬ್ಧದಲ್ಲಿ ಹಸ್ತಕ್ಷೇಪ ಮಾಡುವುದಿಲ್ಲ. ಇದರ ಹೊರತಾಗಿ, ಹಣೆಬರಹದಲ್ಲಿ ಯಾವುದಾರೊಂದು ವಿಷಯ ಸಿಗುವುದಿದ್ದರೆ, ಪ್ರಾರ್ಥನೆ ಮಾಡದೇ ಇದ್ದರೂ, ಅದು ಸಿಗುತ್ತದೆ ಮತ್ತು ಯಾವುದಾದರೊಂದು ವಿಷಯ ಸಿಗುವುದು ಇಲ್ಲದಿದ್ದರೆ, ಪ್ರಾರ್ಥನೆಯನ್ನು ಮಾಡಿದರೂ ಅದು ಸಿಗುವುದಿಲ್ಲ. ಆದುದರಿಂದ ಭಗವಂತನ ಬಳಿ ಪ್ರಾರ್ಥನೆಯನ್ನು ಮಾಡುವಾಗ ಮಾಯೆಗೆ ಸಂಬಂಧಿಸಿದ ಬೇಡಿಕೆಗಳನ್ನು ಇಡುವುದು ಅಂದರೆ ಶಾಶ್ವತ ಭಗವಂತನ ಬಳಿಗೆ ಅಶಾಶ್ವತವಾದ ವಿಷಯಗಳನ್ನು ಬೇಡಿದಂತಾಗುತ್ತದೆ.

ಪ್ರಾರ್ಥನೆಯಲ್ಲಿ ಏನು ಬೇಡಬೇಕು ?

ಪ್ರಾರ್ಥನೆಯನ್ನು ಮಾಡುವುದರಿಂದಾಗುವ ಪರಿಣಾಮ ಅಥವಾ ಲಾಭದ ಬಗ್ಗೆ ನಾವು ಈಗ ತಿಳಿದುಕೊಂಡೆವು. ಆದರೆ ಪ್ರಾರ್ಥನೆಯಿಂದ ಸಾಧನೆಯ ದೃಷ್ಟಿಯಲ್ಲಿ ನಮಗೆ ಯಾವಾಗ ಲಾಭವಾಗುತ್ತದೆ? ನಮ್ಮ ಪ್ರಾರ್ಥನೆ ಯಾವಾಗ ನಿಷ್ಕಾಮವಾಗುವುದೋ, ನಮ್ಮ ಪ್ರಾರ್ಥನೆ ಆಧ್ಯಾತ್ಮಿಕ ಸ್ತರದಲ್ಲಿರುವುದೋ, ಆಗ! ವ್ಯಾವಹಾರಿಕ ಯಶಸ್ಸು ಪಡೆದುಕೊಳ್ಳಲು, ಇಚ್ಛಾಪೂರ್ತಿಗಾಗಿ ಅಥವಾ ಯಾವುದಾದರೊಂದು ವ್ಯಾವಹಾರಿಕ ಅಡಚಣೆಯನ್ನು ಪರಿಹರಿಸಲು ಪ್ರಾರ್ಥನೆಯನ್ನು ಮಾಡುವುದಕ್ಕಿಂತ ಸಾಧನೆಗೆ ಪೂರಕವಾದುದನ್ನು ದೇವರಲ್ಲಿ ಪ್ರಾರ್ಥಿಸಬೇಕು. ಇದರ ಕಾರಣ ನಮ್ಮ ವ್ಯಾವಹಾರಿಕ ಜೀವನದಲ್ಲಿ ಬರುವ ಹೆಚ್ಚಿನ ಪ್ರಸಂಗಗಳು ಪ್ರಾರಬ್ಧಕ್ಕನುಸಾರ ಉತ್ಪನ್ನವಾಗುತ್ತಿರುತ್ತವೆ ಮತ್ತು ನಾವು ಪ್ರಾರಬ್ಧವನ್ನು ಭೋಗಿಸಿ ತೀರಿಸಲೇ ಬೇಕಾಗುತ್ತದೆ. ನಾವು ಸಾಧನೆಯನ್ನು ಮಾಡಿದರೆ, ಪ್ರಾರಬ್ಧವನ್ನು ಸಹಿಸುವ ಬಲ ಸಿಗುತ್ತದೆ. ಪ್ರಾರ್ಥನೆಯಲ್ಲಿ ಮಾಯೆಗೆ ಸಂಬAಧಿಸಿದ ವಿಷಯವನ್ನು ಬೇಡದಿರುವ ಹಿಂದಿನ ಇನ್ನೊಂದು ಕಾರಣವೆಂದರೆ, ವ್ಯಾವಹಾರಿಕ ಕೆಲವು ಇಚ್ಛೆ-ಅಪೇಕ್ಷೆ ಪೂರ್ಣಗೊಳ್ಳಬೇಕು ಎಂದು ನಾವು ದೇವರ ಉಪಾಸನೆಯನ್ನು ಮಾಡುತ್ತಿರುತ್ತೇವೆ, ಅಂದರೆ ಅದು ಸಕಾಮ ಸಾಧನೆಯಾಯಿತು. ವ್ಯಕ್ತಿಯ ಆಧ್ಯಾತ್ಮಿಕ ಉನ್ನತಿಯ ದೃಷ್ಟಿಯಿಂದ ನಿಜವಾದ ಅರ್ಥದಲ್ಲಿ ಲಾಭವಾಗುವುದಿಲ್ಲ. ಆದುದರಿಂದ ಪ್ರಾರ್ಥನೆಯನ್ನು ಮಾಡುವಾಗ ದೇವರ ಬಳಿ ಸಾಧನೆಗೆ ಪೂರಕವಾದದ್ದನ್ನೇ ಬೇಡಬೇಕು. ಸಂತರೂ ದೇವರ ಬಳಿ ‘ನಿನ್ನ ವಿಸ್ಮರಣೆಯಾಗದಿರುವಂತಹ ದಾನವನ್ನೇ ನನಗೆ ನೀಡು ಭಗವಂತಾ’ ಎಂಬಂತಹ ಚಿರಂತನ ಬೇಡಿಕೆಯನ್ನು ಬೇಡಿದ್ದಾರೆ.

ಆಧ್ಯಾತ್ಮಿಕ ಸ್ತರದ ಪ್ರಾರ್ಥನೆಯ ಕೆಲವು ಉದಾಹರಣೆಗಳು

ಆಧ್ಯಾತ್ಮಿಕ ಸ್ತರದ ಅಥವಾ ಸಾಧನೆಗೆ ಪೂರಕವಾಗಿರುವ ಪ್ರಾರ್ಥನೆ ಎಂದರೇನು, ಅದನ್ನು ಹೇಗೆ ಮಾಡಬಹುದು, ಎಂಬ ಪ್ರಶ್ನೆ ನಿಮ್ಮ ಮನಸ್ಸಿನಲ್ಲಿರಬಹುದು. ಈಗ ನಾವು ಆ ಬಗ್ಗೆ ತಿಳಿದುಕೊಳ್ಳೋಣ. ಪ್ರಾರ್ಥನೆಯನ್ನು ಕೇವಲ ದೇವಸ್ಥಾನಕ್ಕೆ ಹೋದ ನಂತರ ಅಥವಾ ದೇವರೆದುರು ನಿಂತುಕೊಂಡಾಗಲೇ ಮಾಡಬೇಕು ಎಂದೇನಿಲ್ಲ. ನಾವು ದಿನವಿಡಿ ಅನೇಕ ಕೃತಿಗಳನ್ನು ಮಾಡುತ್ತೇವೆ. ಆ ಕೃತಿಗಳನ್ನು ಮಾಡುವ ಮೊದಲು ನಾವು ಮನಸ್ಸಿನಲ್ಲಿಯೇ ದೇವರನ್ನು ಸ್ಮರಿಸಿ ಪ್ರಾರ್ಥನೆಯನ್ನು ಮಾಡಬಹುದು.

ಉದಾಹರಣೆಗಳು

1. ಹೇ ಭಗವಂತಾ, ನನ್ನ ಸಾಧನೆಯಲ್ಲಿರುವ ಅಡಚಣೆಗಳು ದೂರವಾಗಲಿ.
2. ನನಗೆ ನಾಮಜಪ ಮಾಡಲು ನೆನಪಾಗಲಿ.
3. ಹೇ ಭಗವಂತಾ, ನೀನೇ ನನ್ನಿಂದ ಏಕಾಗ್ರತೆಯಿಂದ ಮತ್ತು ಭಾವಪೂರ್ಣ ನಾಮಜಪವನ್ನು ಮಾಡಿಸಿಕೋ.
4. ಹೇ ಈಶ್ವರಾ, ಭಗವಂತನ ಮೇಲಿರುವ ನನ್ನ ಶ್ರದ್ಧೆಯು ಹೆಚ್ಚಾಗಲಿ. ದಿನವಿಡಿ ಘಟಿಸುವ ಪ್ರತಿಯೊಂದು ಪ್ರಸಂಗದಲ್ಲಿ ನನಗೆ ಶಾಂತ, ಸ್ಥಿರ ಮತ್ತು ಆನಂದಿಯಾಗಿರಲು ಸಾಧ್ಯವಾಗಲಿ. ನನ್ನ ಪ್ರತಿಯೊಂದು ಕೃತಿ ಸಾಧನೆಯೆಂದು ಆಗಲಿ.
5. ಹೇ ನಾರಾಯಣಾ, ನನಗೆ ಪ್ರತಿಯೊಂದು ಪರಿಸ್ಥಿತಿಯನ್ನು ಸ್ವೀಕರಿಸಲು ಸಾಧ್ಯವಾಗಲಿ. ನನಗೆ ನಿನ್ನ ಅಸ್ತಿತ್ವವನ್ನು ಅನುಭವಿಸಲು ಸಾಧ್ಯವಾಗಲಿ. ನಿನ್ನ ಬಗ್ಗೆ ನನ್ನಲ್ಲಿ ಅನನ್ಯ ಭಕ್ತಿ ಉತ್ಪನ್ನವಾಗಲಿ. ಒಂದು ಕ್ಷಣವೂ ನನಗೆ ನಿನ್ನ ವಿಸ್ಮರಣೆಯಾಗದಿರಲಿ. ನಾನೆಲ್ಲಿ ತಪ್ಪುತ್ತೇನೆಯೋ, ನನಗೆ ಅದರ ಅರಿವಾಗಲಿ ಮತ್ತು ನನ್ನಿಂದ ಯೋಗ್ಯವಾದ ಕೃತಿಯಾಗಲಿ. ಹೇ ಭಗವಂತಾ, ನನಗೆ ನಾಮಸ್ಮರಣೆ ಮಾಡಲು ನೆನಪಾಗಲಿ.

ಇಂತಹ ಪ್ರಾರ್ಥನೆಯನ್ನು ನೀವು ಮಾಡಬಹುದು. ಇದು ಮಾತ್ರವಲ್ಲ, ಬೆಳಗ್ಗೆ ಎದ್ದಾಗಿನಿಂದ ರಾತ್ರಿ ಮಲಗುವವರೆಗೆ ನಾವು ಮಾಡುವ ಅನೇಕ ಕೃತಿಗಳಲ್ಲಿ ಆಯಾ ದೇವತೆಯನ್ನು ಉದ್ದೇಶಿಸಿ ಪ್ರಾರ್ಥನೆ ಸಲ್ಲಿಸಬಹುದು. ಕೆಲವು ಉದಾಹರಣೆಗಳನ್ನು ಇಲ್ಲಿ ನೀಡಲಾಗಿದೆ.

ಬೆಳಗ್ಗೆ ಎದ್ದನಂತರ ಮಾಡಬೇಕಾದ ಪ್ರಾರ್ಥನೆ

ಹೇ ಭಗವಂತಾ, ನಿನ್ನ ಕೃಪೆಯಿಂದಲೆ ನನಗೆ ಈ ದಿನವನ್ನು ನೋಡಲು ಸಿಕ್ಕಿದೆ. ನೀನೇ ದಿನದಾದ್ಯಂತ ನನ್ನಿಂದ ಸಾಧನೆಗಾಗಿ ಪ್ರಯತ್ನಗಳನ್ನು ಮಾಡಿಸಿಕೋ.

ಊಟದ ಮೊದಲು ಮಾಡಬೇಕಾದ ಪ್ರಾರ್ಥನೆ

ಹೇ ಅನ್ನಪೂರ್ಣಾಮಾತೆ, ನಿನ್ನ ಕೃಪೆಯಿಂದಲೇ ದೊರಕಿದ ಆಹಾರವನ್ನು ನಾನು ‘ಪ್ರಸಾದ’ ಎಂಬ ಭಾವದಿಂದ ಸೇವಿಸುವಂತಾಗಲಿ. ಇದರಿಂದ ನನಗೆ ಸಾಧನೆ ಮಾಡಲು ಶಕ್ತಿ ಮತ್ತು ಚೈತನ್ಯವು ದೊರಕಲಿ.

ಸ್ನಾನ ಮಾಡುವಾಗ ಮಾಡಬೇಕಾದ ಪ್ರಾರ್ಥನೆ

ಹೇ ಜಲದೇವತೆ, ನಿನ್ನ ಚೈತನ್ಯದಿಂದ ನನ್ನ ಸುತ್ತಲಿರುವ ರಜ-ತಮದ ಆವರಣವು ನಾಶವಾಗಲಿ. ನನಗೆ ಚೈತನ್ಯವು ದೊರಕಲಿ.

ಮಲಗುವ ಮೊದಲು ಮಾಡಬೇಕಾದ ಪ್ರಾರ್ಥನೆ

ಹೇ ನಿದ್ರಾದೇವಿ, ನನ್ನ ಸುತ್ತಲೂ ಅಖಂಡವಾಗಿ ನಿನ್ನ ಸಂರಕ್ಷಣಾ-ಕವಚವು ಇರಲಿ. ನಿದ್ದೆಯಲ್ಲಿಯೂ ನನ್ನ ನಾಮಜಪವು ನಡೆಯುತ್ತಿರಲಿ.

ಈ ಸ್ವರೂಪದ ಪ್ರಾರ್ಥನೆ ನಮಗೆ ಎಷ್ಟು ಹೊಂದುತ್ತದೆಯೋ, ಹೊಳೆಯುತ್ತದೆಯೋ ಆ ರೀತಿ ಮಾಡಬಹುದು.

ಪ್ರಾರ್ಥನೆ ಮಾಡುವಂತೆ ನೆನಪಾಗಲು ಮಾಡಬೇಕಾದ ಪ್ರಯತ್ನ ಮತ್ತು ಧ್ಯೇಯ

ಈ ವಾರದಲ್ಲಿ ನಾವು ಕೃತಿಗೆ ಜೋಡಿಸಿ ದಿನವಿಡಿ ಕನಿಷ್ಠ 25 ಸಲ ಪ್ರಾರ್ಥನೆಯನ್ನು ಮಾಡಲು ಪ್ರಯತ್ನಿಸೋಣ. ಪ್ರಾರ್ಥನೆ ಮಾಡಲು ನೆನಪಾಗಬೇಕೆಂದು ನಾವು ನಮ್ಮ ಮೊಬೈಲ್ ನಲ್ಲಿ ಅಲಾರ್ಮ್ ಹಾಕಿಡಬಹುದು. ಕೆಲವು ಪ್ರಾರ್ಥನೆಗಳನ್ನು ಬರೆದು ತೆಗೆದು ಅವನ್ನು ಮನೆಯಲ್ಲಿ ನಾವು ಎಲ್ಲಿ ಹೆಚ್ಚು ಸಮಯ ಇರುತ್ತೇವೆಯೋ, ಅಲ್ಲಿ ಗೋಡೆಯ ಮೇಲೆ ಅಂಟಿಸಿ ಬರುವಾಗ-ಹೋಗುವಾಗ ಓದಬಹುದು ಅಥವಾ ಪುಸ್ತಕದಲ್ಲಿ ಬರೆದು ಓದಬಹುದು. ಪ್ರಾರ್ಥನೆಯಲ್ಲಿ ಶಬ್ದಕ್ಕಿಂತಲೂ ಭಾವ ಮಹತ್ವದ್ದಾಗಿದೆ. ಅನೇಕ ಜನರು ಪ್ರಾರ್ಥನೆಯನ್ನು ಮಾಡಿದ ನಂತರ ಬುದ್ಧಿಯ ಆಚೆಗಿನ ಅನುಭೂತಿಯನ್ನು ಪಡೆದಿದ್ದಾರೆ. ನಾವು ಸ್ವತಃ ಪ್ರಾರ್ಥನೆ ಮಾಡಿ ಅನುಭವ ಪಡೆಯೋಣ.

ಇನ್ನೊಂದು ಮಹತ್ವದ ಅಂಶವೆಂದರೆ ನಮ್ಮ ಪ್ರಾರ್ಥನೆ ದೇವರಿಗೆ ಅಥವಾ ಶ್ರೀಗುರುಗಳಿಗೆ ತಲುಪುತ್ತದೆಯೋ ಇಲ್ಲವೋ ಎಂಬ ಸಂದೇಹವನ್ನು ಮನಸ್ಸಿನಲ್ಲಿ ತರುವುದು ಬೇಡ. ಇರುವೆಯ ಕಾಲಿಗೆ ಕಟ್ಟಿದ ಗೆಜ್ಜೆಯ ಸದ್ದು ಸಹ ದೇವರಿಗೆ ತಲುಪುತ್ತದೆ ಎಂದಾದರೆ, ನಾವು ಮಾಡಿದ ಪ್ರಾರ್ಥನೆ ದೇವರಿಗೆ ಏಕೆ ತಲುಪುವುದಿಲ್ಲ? ನಾವು ಮಾಡಿದ ಪ್ರತಿಯೊಂದು ಪ್ರಾರ್ಥನೆ ದೇವರ ಬಳಿ ನೋಂದಾಯಿಸಲ್ಪಡುತ್ತದೆ, ಎಂಬ ಭಾವವನ್ನಿಟ್ಟು ನಾವು ಈ ವಾರದಿಂದ ಹೆಚ್ಚೆಚ್ಚು ಪ್ರಾರ್ಥನೆಯನ್ನು ಮಾಡಲು ಪ್ರಯತ್ನಿಸೋಣ.

ಈ ಸಂದರ್ಭದಲ್ಲಿ ಸನಾತನವು ‘ಪ್ರಾರ್ಥನೆ’ ಈ ಕಿರುಗ್ರಂಥವನ್ನೂ ಪ್ರಕಾಶಿಸಿದೆ. ತಾವು ಅದರ ಲಾಭ ಪಡೆಯಬಹುದು. (Sanatan Shop)

ಇಂದಿನ ಸತ್ಸಂಗದಲ್ಲಿ ನಾವು ಪ್ರಾರ್ಥನೆ ಎಂದರೇನು, ಪ್ರಾರ್ಥನೆ ಮಾಡುವುದರ ಮಹತ್ವ ಮತ್ತು ಪರಿಣಾಮ, ಪ್ರಾರ್ಥನೆಯಲ್ಲಿ ದೇವರ ಹತ್ತಿರ ಏನು ಬೇಡಬೇಕು, ಹಾಗೆಯೇ ಆಧ್ಯಾತ್ಮಿಕ ಸ್ತರದ ಪ್ರಾರ್ಥನೆ ಇತ್ಯಾದಿ ಅಂಶಗಳನ್ನು ತಿಳಿದುಕೊಂಡೆವು. ಯಾವುದೇ ಕೃತಿಯನ್ನು ಮಾಡುವ ಮೊದಲು ಪ್ರಾರ್ಥನೆಯನ್ನು ಮಾಡುವುದರಿಂದ ಆತ್ಮಶಕ್ತಿ ಮತ್ತು ಆತ್ಮವಿಶ್ವಾಸ ಹೆಚ್ಚಾಗುತ್ತದೆ. ಅದರಿಂದ ಕಾರ್ಯವು ಚೆನ್ನಾಗಿ ಮತ್ತು ಯಶಸ್ವಿಯಾಗುತ್ತದೆ. ಸರ್ವಶಕ್ತಿಶಾಲಿ, ಸರ್ವಜ್ಞ, ಸರ್ವವ್ಯಾಪಿಯಾದ ಭಗವಂತನಿಗೆ ಅಸಾಧ್ಯವಾದದ್ದು ಯಾವುದೂ ಇಲ್ಲ. ಪ್ರಾರ್ಥನೆಯ ಮಾಧ್ಯಮದಿಂದ ನಮ್ಮ ಅಹಂಕಾರವು ಬೇಗನೆ ಕಡಿಮೆಯಾಗಲು ಸಹಾಯವಾಗುತ್ತದೆ. ಪ್ರಾರ್ಥನೆಯಿಂದ ಕರ್ತೃತ್ವವು ಅಳಿದುಹೋಗುತ್ತದೆ ಮತ್ತು ಶರಣಾಗತಿ ಹೆಚ್ಚಾಗುತ್ತದೆ. ಇವುಗಳಿಂದ ಪ್ರಾರ್ಥನೆಯನ್ನು ಮಾಡುವುದರ ಅಸಾಧಾರಣ ಮಹತ್ವವು ತಮ್ಮ ಗಮನಕ್ಕೆ ಬಂದಿರಬಹುದು, ಆದುದರಿಂದ ಇಂದಿನಿಂದ ಪ್ರಾರ್ಥನೆಯ ಧ್ಯೇಯವನ್ನಿಟ್ಟುಕೊಂಡು ನಾವು ಭಾವಪೂರ್ಣ ಪ್ರಾರ್ಥನೆಯನ್ನು ಮಾಡೋಣ. ಪ್ರಾರ್ಥನೆಯನ್ನು ಮಾಡುವ ಮೊದಲು ಮತ್ತು ಪ್ರಾರ್ಥನೆ ಮಾಡಿದ ನಂತರ ನಾವು ಏನು ಅನುಭವಿಸಿದೆವು ಎಂಬುದನ್ನು ಅನುಭವಿಸೋಣ.